Acem Türkçesi Örnek

Fuzuli'nin "Şikayetnâme" adlı eseri, bu dile örnek olarak verilebilir:

Selam virdüm, rüşvet degüldür diyü almadılar. Hükm gösterdüm, fâidesüzdür diyü mültefit olmadılar. Egerçi zahirde suret-i itaat gösterdiler amma zebân-ı hâl ile cemî'i su'alime cevab virdiler.

Didüm:

— Yâ eyyühe'lashâb bu ne fi'l-i hatâ ve ne çîn-i ebrûdur.

Didiler:

— Muttasıl bizüm adetimüz budur.

Didüm:

— Benüm ri'âyetümi vâcib görmişler ve bana berât-ı tekâ'üd virmişler ki evkâfdan hemişe behr-mend olam ve padişaha ferâgatla du'a kılam.

Didiler:

— Ey miskin senün mezâlimine girmişler ve sermaye-i tereddüd virmişler ki müdâm fa'idesiz cidâl edesin ve nâ-mübârek yüzleri görüp nâmülâyim sözler işidesin.

Didüm:

— Berâtımun mazmunı ne içün suret bulmaz.

Didiler:

— Zevâ'iddür husûli mümkin olmaz.

Didüm:

— Böyle evkaf zevayidsiz olur mı?

Didiler:

— Zarûrîyât-ı asitâneden kalursa bizden kalur mı?

Didüm:

— Vakf malın ziyade tasarruf itmek vebaldür.

Didiler:

— Akçemiz ile satın almışuz bize helaldür.

Didüm:

— Hisâb alsalar bu sülûkunuzun fesâdı bulunur.

Didiler:

— Bu hisâb kıyametde alınur.

Didüm:

— Dünyâda dahî hisâb olur haberin işitmişsinüz.

Didiler:

— Andan dahi bâkimüz yokdur, kâtipleri razı itmişüz.

Gördüm ki sualime cevâbdan gayrı nesne virmezler ve bu berâtile hâcetüm revâ kılmağın görmezler, nâ-çâr terk-i mücadele kıldum ve me'yûs u mahrum gûşe-i ‘uzletimde çekildüm.